Toshkent shahar hokimligi “Ilhom” teatri yopilishiga oid xabarlarga munosabat bildirib, jumladan, “Shodlik” mehmonxonasi binosi xususiy tadbirkorga tegishli ekanligini (“Ilhom” teatri mehmonxona binosida joylashgan, -tahr.) va uning Toshkent shahar hokimligi tasarrufida emasligini ma’lum qildi.

Shuningdek, Shayxontohur tumani hokimligi tomonidan tadbirkorga ushbu binoni ta’mirlashi zarurligi haqida ko‘rsatma berilganiga oid ma’lumot o‘rganilayotganligi keltirib o‘tilgan.

Eslatib o‘tamiz, “Ilhom” teatri “Shodlik” mehmonxonasining yangi muassisi “OFELOS PLAZA” MChJdan joriy yilning 7-fevral kuni binoni bo‘shatish haqidagi xatni olgan. 1976-yilda Mark Vayl tomonidan asos solingan “Ilhom” teatriga nisbatan bunday xatti-harakatga teatr ma’muriyatining munosabati haqida avvalgi xabarlarimizda ma’lum qilgan edik.