Bugun tongda Ukraina dronlari Rossiyaning bir qator hududlariga hujum uyushtirgan. Hujum natijasida Samara va Ryazan viloyatlaridagi neftni qayta ishlash zavodlarida yong‘in chiqqani ma’lum qilindi.

Ryazan viloyati hokimiyati dronlar hujumi faktini tasdiqladi. Xususan, Ryazan viloyati gubernatori Pavel Malkov korxona hududiga vayronalar tushib ketgani, oqibatlari bartaraf etilayotgani haqida xabar bergan.

Shuningdek, Penza shahridagi “Elektropribor” va mahalliy radiozavodga ham dronlar hujum qilgani xabar berilmoqda. Ma’lumotlarga ko‘ra, shahar ustida beshta portlash qayd etilgan.

Bu zavod Rossiya Federatsiyasi harbiy-sanoat kompleksi uchun katta ahamiyatga ega. Uning faoliyati bevosita mudofaa sohasi va davlat mudofaa buyurtmasini amalga oshirish bilan bog‘liq.

Rossiya Mudofaa vazirligi tunda Ukrainaning 112 ta uchuvchisiz uchish qurilmasini urib tushirganini ma’lum qilgan. Vazirlikka ko‘ra, ular Rostov viloyati va Krasnodar o‘lkasi ustida urib tushirilgan.

• Rossiya
• Ukraina
• dron
• hujum