Bugun, 22-avgustda Axborot va ommaviy kommunikatsiyalar agentligida “O‘zstandart” agentligi mutasaddilari ishtirokida brifing va jurnalistlar bilan muloqot bo‘lib o‘tdi. Tadbirda “O‘zbekiston Respublikasida muvofiqlikni baholash tizimini yanada takomillashtirish, sinov laboratoriyalari kompleksini rivojlantirish to‘g‘risidagi”gi Prezident qarori ijrosi yuzasidan ma’lumot taqdim etildi. 

Shuningdek, anjumanda respublikada ishlab chiqarilayotgan mahsulotlarning sifati va eksport hajmini oshirish, ularning xalqaro standartlarga muvofiq ishlab chiqarilishini ta’minlash hamda mavjud sinov va kalibrlash laboratoriyalarini modernizatsiya qilish, aholiga sifatli va xavfsiz mahsulotlar yetkazib berish masalalari muhokama qilindi. 

Shuningdek, Ochiq muloqot davomida Xabardor.uz muxbirining “O‘zbekistondagi standartlar xalqaro standart talablariga javob bermaydi. Shu bois ko‘pgina mahsulotlarimizni chet elga eksport qila olmaymiz. Ularni uyg‘unlashtirish asosida, daromadli va sifatli eksport qilish uchun agentlik qanday chora-tadbirlarni amalga oshirmoqda?”, deya bergan savoliga “O‘zStandart” agentligi direktori Dilshod Sattorov quyidagicha javob qaytardi: 
– Biz hozirda aynan shu masalada yangi ishlarni amalga oshiryapmiz. Milliyligimizdan, mahalliy iqlim sharoitidan kelib, chiqib yetishtiradigan mahsulotlarmizni xalqaro bozorga olib chiqadigan yo‘nalish ustida ishlayapmiz. Lekin bitta standart ishlab chiqish uchun 6 oy, ayrimlariga 2 yilgacha vaqt talab qilinadi. Chunki uni barcha davlatlarga isbotlashimiz kerak. Hozirda biz 14 turdagi mahsulotlarini eksport qilish bo‘yicha ish olib boryapmiz. Agar 2 yil avvalgi uyg‘unlashtirish masalasiga kelsak, juda eski standart edi. Hozirda yiliga 3 mingta standart qabul qilish orqali joriy va kelasi yillarda eksport qiluvchilarga kerakli barcha standartlarni olib beramiz, dedi D.Sattorov.

–  Masalan, hammaga bir xil standart kerak bo‘lmaydi. Kimgadir Amerikaning faqat bitta standarti kerak bo‘lishi mumkin. Agar ishlab chiqaruvchi so‘rasa, aytgan standartni olib beramiz. Undan so‘ng oldimizda turgan ikkinchi vazifa, ma’lum mahsulot standart asosida ishlab chiqilgandan so‘ng  amerikaliklarga shu standartga mosligini isbotlash uchun u yerdagi sinov laboratoriyasi kelishuv belgilaymiz. Hozirda elektrotexnika sohasidagi ayrim mahsulotlar to‘laligicha Amerika standarti asosida ishlab chiqarilmoqda, ta’kidladi u.

–  Shuningdek, eksport qiluvchi korxonalar xalqaro talab asosida sifat menejmentini joriy qiladigan bo‘lsa, Markazlashgan mablag‘ hisobidan to‘liq xarajatlar qoplab berilyapti. Biz korxonaning katta yoki kichikligidan kelib chiqib 10 million so‘mdan  40 million so‘mgacha bo‘lgan xarajatlarni nazarda tutyapmiz. Agar eksportbop mahsulot bo‘lsa, Amerika yoki Yevropa talabi asosida sinovdan o‘tkazilayotganda  40, 50, 60 millionlik sinovlar va sertifikatlash xarajatlari markazlashgan, ayniqsa, Investitsiyalar va tashqi savdo vazirligining eksportga ko‘maklashish agentligi fondi hisobidan to‘liq qoplab berish mexanizmi qabul qilindi. Qolaversa, yo‘l haqi xarajatlarining ham 50 foizi qoplab beriladi. Bugungi kunda, eksportbop mahsulot ishlab chiqarish uchun barcha shart-sharoit yaratib berilmoqda.