Garchi, manniy bo‘tqasi mashhur taomlar sirasiga kirmasa ham uning davolovchi xususiyatga ega ekanligiga hech kim e’tiroz qilmasa kerak. Xo‘sh, ideal darajadagi manniy bo‘tqasi  qanday tayyorlanadi?  
 
Manniy bo‘tqasini tayyorlashdagi asosiy muammo – uning  aniq ideal darajadagi yo‘riqnomasi, ya’ni qancha miqdorda nima olinadi va qanday amalga oshirish qo‘llanmasi yo‘qligidadir. Shuning uchun ham u ko‘plarga yoqimsizdek tuyuladi. Ustiga ustak orasida “dumaloq”chalari ham bo‘lsa bormi... 

Eng yomoni, bolalarini manniy bo‘tqasini yeyishga majbur qiladigan ota-onalarning o‘zlari unga qayrilib ham qaragisi kelmaydi. Agar siz shunday ota-onalardan biri bo‘lsangiz, bolangiz ham butun umr shu bo‘tqani yoqtirmay o‘tishiga ishonavering.    
 
O‘zingizni bolaning o‘rniga qo‘yib ko‘ring: hozirgina bolangiz uchun tayyorlagan bo‘tqani o‘zingiz yermidingiz? Ana shunaqa. Xulosa oddiy: hammasi yaxshi chiqishi uchun kayfiyat bilan mehr zarur. 

Tayyorlash jarayonida nisbatni 1 litr sutga 6 oshqoshiq manniy miqdorida oling. Bu eng o‘rtacha holat. Qozonchaga sutni solib qaynashini kuting. Qaynab chiqqanidan keyin manniy yormasini asta-sekin sepgan holda to‘xtamasdan aralashtirib turing. Agar shunday qilsangiz “dumaloq”chalar hosil bo‘lmaydi.

Layfxak: agar bo‘tqa tayyorlashdan oldin manniy yormasi quruq tovada jigarrangga kirgunicha qovurilib olinsa, bo‘tqaga yong‘oq ta’mini beradi. Agar qovurilgan manniy ustiga qaynoq sut quyib pishirilsa, ajabtovur mazali chiqadi.

Eslab qoling: bo‘tqaning tuzi sut qaynab chiqqan vaqtda solinadi, undan keyin yorma qo‘shiladi. Bo‘tqaga turli rezavorlar, yong‘oqlar qo‘shib ta’mini o‘zgartirish mumkin.
    
Manniy bo‘tqasi saryog‘siz bo‘lar ekanmi? Qaynash vaqti 5-7 daqiqaga yetganda bo‘tqa tayyor bo‘ladi. Xuddi shu paytda unga saryog‘ qo‘shilib, yaxshilab aralashtirilsa ko‘pirib ketadi.
 
Tayyor bo‘tqa likopchaga suzilgandan keyin, usti rezavorlar bilan bezatiladi. Qadim zamonlarda manniy bo‘tqasiga murabbo ham qo‘shilgan. Bu endi ta’bingizga bog‘liq.