Har bir bola dunyoni o‘zicha anglaydi, shuning uchun bu ayrim hollarda bolalar o‘rtasidagi o‘zaro tushunmovchilik va mojarolarga sabab bo‘ladi. Agar bu muammolar ulg‘aygach o‘tib ketganida edi, hayot osonroq bo‘lardi, biroq ko‘pchilik o‘smirlik vaqtida ham muloqotda murakkabliklarga duch keladi.

Shuning uchun ham bugungi to‘plamda maktabgacha ta'lim yoshidagi bolalarni ham, o‘n birinchi sinf o‘quvchilarini ham muloqot qilishga o‘rgatadigan kitoblar haqida ma'lumot beramiz.

«Sasha va mittivoy»

Oilada farzandning dunyoga kelishi kutilayotganida to‘ng‘ich farzand zo‘riqish holatini his etishi mumkin. U ota-onasi endilikda uni yaxshi ko‘rmay qolishi, barcha o‘yinchoqlarni uka yoki singilga berishlaridan cho‘chiydi. Anna-Karen Garxman tomonidan yozilgan kitob esa bolalarcha qo‘rquv va qizg‘anish hissini yengishda yordam beradi.

«Bolalar aldaganida nima qilish kerak?»

Pol Ekman o‘z kitobida bola aldaganida u bilan qanday suhbatlashish haqida yozadi. Muallif yolg‘on so‘zlashning sabablari va turlari (himoyalanish, maqtanish yoki ma'lumotni bo‘lishishni rad etish maqsadidagi yolg‘on) haqida so‘zlab,  bolalar nima uchun erta yoshda yolg‘on gapirishni boshlashlari haqida tushuntiradi va ota-onalarga harakatlar rejasini ham taqdim etadi.

«Tilla bola»

Lavern Entrobas bola o‘zini ota-onasi istaganidek tutmaganida kattalar nima qilishi kerakligi haqida hikoya qiladi. Spoyler: Sho‘xlik va erkalik bu – normal holat.

«Monsiki» 

Viktoriya va Gleb Shimanskiylar bolalar uchun sehrli mavjudot – Monsikilar olamini yaratishdi. Ular bolaga o‘z hislarini nazorat qilishni o‘rgatadi: g‘azabni tiyish, xursandchilikni odob bilan ifoda etish, qayg‘uni yengish. Bu kitob bolaga o‘z hislarini boshqarishda ko‘makchi bo‘la oladi.

«Bolalarga muhim narsa haqida»

Natalya Remish o‘z kitobida juda muhim mavzuga qo‘l urgan. Bolalar ko‘pincha «noqulay» savollar berishadi: «Nima uchun men bilan do‘st bo‘lishni istashmaydi?», «Nimaga anavi bola yurmaydi?», «Nima uchun bu narsani sotib ololmaymiz?». Muallif bolalarga ularni qiziqtirgan savollarga o‘yin tarzida javob berish haqida hikoya qiladi.

«Tarbiyadan ozod bo‘lish»

Dima Zitser har daqiqada sergak bo‘lib, tarbiya qilish zarur emas deb hisoblaydi. U «kattalarga xos» jiddiy pand-nasihatlarni ko‘proq foyda keltiradigan yengil muloqotga almashtirish kerak deb hisoblaydi. Ana shunda ota-ona va farzandlar uzoqlashmaydi, aksincha bir-birini qadrlashni boshlaydi.

«Kel, do‘st bo‘lamiz! Bolani do‘st orttirishga qanday o‘rgatish mumkin?»

Xilari Pereyra bu kitobni nafaqat do‘stlasha olmayotgan farzandlarning ota-onalari, balki do‘stlari ko‘p bo‘lganlarga ham atab yozgan. Bola o‘zganing ta'siriga tushib qolmasligi uchun nima qilish kerak? O‘z-o‘zini yengib, muloqot qilishni qanday boshlash mumkin? Barcha javoblar – ana shu kitobda.

«Qizlarning katta hayotga yetti qadami»

Birinchi navbatda bu ota-onalar uchun yozilgan qo‘llanma. Liza Damur o‘z kitobida katta odamlarga «deyarli katta odam»ni tushunishda yordam berishga harakat qilishgan. Ko‘pchilik ota-onalar qizlarining ulg‘ayishi – oldindan aytib bo‘lmaydigan va boshqarilmaydigan jarayon deb hisoblashadi. Biroq bunday emas. Aslida esa o‘smir qizlarning g‘alati xatti-harakatlari mantiqiy maqsadlarga bo‘ysunadi.

«Kommunikatsiyalar»

Rita Karterning kitobi o‘smirlarga «kattalarga xos» muloqot qilishda yordam beradi: suhbatdoshni tushunish, yashirin imo-ishoralarni tushunish, shaxsiy fikrlarni yashirish. Bundan tashqari, muallif ilk ijobiy taassurot qoldirish va unga kutilmagan gap bilan putur yetkazmaslikni o‘rgatadi.

«Ahamiyatga egasan»

Kortni Makavinta va Andrea Vander Playm bu kitobni o‘smir qizlarga atab yozishgan. U yosh qizlarni o‘z-o‘zini hurmat qilish, atrofdagilarning fikriga qaramay mustaqil qarorlar qabul qilishga o‘rgatadi. Mualliflar shaxsiy chegaralarni bolalik davrida o‘rnatish va himoya qilishni bilish kelajakdagi umidsizliklarning oldini olishi mumkin deb hisoblashadi.