Zelenskiy taklifni manipulyatsiya sifatida baholab, uch kunlik emas, balki 30 kunlik sulh zarurligini ta’kidlagan.

“Biz Ukrainada bu urushning bir lahzasini ham istamagandik va doimo tinchlikni o‘rnatish hamda xavfsizlikni ta’minlashga yordam bera oladigan barcha hamkorlar bilan iloji boricha tezroq ishlashga tayyorligimizni aytib kelmoqdamiz. Rossiya esa bularning barchasini muntazam ravishda rad etib, dunyoni chalg‘itmoqda va Qo‘shma Shtatlarni aldashga urinmoqda.

Hozir yana bir bor manipulyatsiya qilishga urinish: negadir hamma 8-mayni kutib, shundagina Putinning parad vaqtidagi sukunatini ta’minlash uchun o‘t ochishni to‘xtatishi kerak ekan. 8-mayni kutishga hech qanday asos yo‘q. O‘t ochishni bir necha kunga emas, balki darhol, to‘liq va so‘zsiz to‘xtatish kerak va bu kamida 30 kun davom etishi lozim”, – degan Vladimir Zelenskiy.

Rossiya Federatsiyasi prezidenti Vladimir Putin G‘alabaning 80 yilligi munosabati bilan uch kunlik vaqtinchalik sulh e’lon qildi. Unga ko‘ra, 7-maydan 8-mayga o‘tar kechasi soat 00:00 dan 10-maydan 11-mayga o‘tar kechasi soat 00:00 gacha Rossiya tomonidan barcha jangovar harakatlar to‘xtatilishi ko‘zda tutilgan.

• Bitim
• Putin
• Rossiya
• Ukraina
• Zelenskiy