Endilikda bazaviy hisoblash miqdori (BHM)ning 2 baravaridan 5 baravarigacha so‘ndirilmagan qarzlari bo‘lgan shaxslarning mamlakatdan chiqishi cheklanadi. Bu haqida Norma.uz xabar bermoqda.

Xabarda aytilishicha, ijro hujjatlari bo‘yicha qarzdor jismoniy shaxslarning chiqish huquqini vaqtinchalik cheklash hamda ushbu jarayonda mas’ul tuzilmalarning o‘zaro munosabatlari bo‘yicha yangi tartib tasdiqlandi. Ilgari amal qilgan nizom o‘z kuchini yo‘qotgan.

Ijro ishi bo‘yicha qarzdorning mamlakatdan chiqishiga ruxsat beriladigan qarz miqdori 2 BHMdan 5 BHMgacha oshirildi (maqola e’lon qilinganda – 1 115 000 so‘m). Ya’ni ushbu raqamdan oshadigan miqdorda so‘ndirilmagan qarzlari bo‘lgan shaxslarning mamlakatdan chiqishi cheklanadi.

Hujjatda shuningdek chiqishga cheklov qo‘yish va uni olib tashlashda ayrim tuzilmalar o‘zaro munosabatlarining yangilangan mexanizmi taqdim etilgan.

Qarzdorning chiqishini vaqtincha cheklash to‘g‘risidagi ma’lumot davlat ijrochisi tomonidan:

• Yagona idoralararo elektron hamkorlik tizimi orqali Migratsiya va fuqarolikni rasmiylashtirish bosh boshqarmasiga hamda DXX Chegara qo‘shinlariga yuboriladi. Ular, o‘z navbatida, elektron bazalariga tegishli ma’lumotlarni kiritadilar;

• qarzdor, shuningdek undiruvchiga (chiqishni vaqtincha cheklash undiruvchining arizasiga binoan qo‘llanilgan bo‘lsa) ma’lumot yuboriladi. Ma’lumot elektron pochta yoki mobil telefonga SMS ko‘rinishida yo‘llanadi. Bunday xabardor qilishning imkoni bo‘lmagan taqdirda, davlat ijrochisi tomonidan qaror chiqarilgan kunning ertasidan kechiktirmasdan qarorning ko‘chirma nusxalari yashash manzili bo‘yicha pochta orqali yuboriladi.

Migratsiya va fuqarolikni rasmiylashtirish bo‘limlari, shuningdek chegara qo‘shinlari bo‘linmalari tomonidan qarzdorga MIBning qaysi tuman (shahar) bo‘limlari tomonidan O‘zbekiston Respublikasidan chiqishi cheklangani to‘g‘risida ma’lumot beriladi. 

Bundan tashqari, alimentlar bo‘yicha qarzlar so‘ndirilishi chiqishni cheklashni olib tashlashga asos bo‘lmaydi. Alimentlarni oldindan to‘lash yoki alimentlarni to‘lash majburiyatini ta’minlash uchun garov shartnomasini tuzish lozim.  

Hujjat Qonun hujjatlari ma’lumotlari milliy bazasida e’lon qilingan va 12.11.2019 yildan kuchga kirdi.