Prezidentning joriy yil 27-maydagi tegishli qaroriga ko‘ra, mamlakatdagi tez tibbiy yordam xizmati uchun zamonaviy rusumdagi avtomashinalar xarid qilish belgilab qo‘yilgan edi.

SSV xabariga ko‘ra, ushbu qaror ijrosini ta’minlash maqsadida vazirlik va Jizzax avtomobil zavodi o‘rtasida tez tibbiy yordam mashinalarini yetkazib berish bo‘yicha shartnoma imzolangan.

Bugun, 24-sentyabr kuni esa mazkur shartnomaga muvofiq A toifali Volkswagen Caddy tez tibbiy yordam avtomashinalarining birinchi bosqichini hududiy sog‘liqni saqlash boshqarmalari tizimidagi tez tibbiy yordam shoxobchalariga yetkazib berish boshlandi.

Qayd etilishicha, mazkur zamonaviy avtomashinalar mamlakatning barcha hududlariga teng taqsimlanadi va ushbu xizmatning avtotransport parkidagi eski Damas avtomashinalarini almashtiradi.

SSV matbuot xizmatiga ko‘ra, mazkur ambulans aynan qaysi tibbiy yo‘nalishda foydalanilishiga qarab jihozlab berilishi mumkin.

Eslatib o‘tamiz, 2020-yilda Toshkent shahar “Tez yordam” stansiyasiga 150 dona “Ford” rusumli reanimatsion tibbiy apparatlar bilan jihozlangan avtomashinalar xarid qilingan edi.