Xalqimizning ma’naviy va madaniy merosi shunday boy ummonki, unga qancha chuqur sho‘ng‘iganing sayin yanada noyob javohirlarga duch kelaverasan. Shunday ajoyibotlardan biri - yetti xazina haqida hech eshitganmisz?

Xalqimiz yetti xazina deganda, sigir, tovuq, asalari, ipak qurti, objuvoz (moyjuvoz), tegirmon va o‘rmonni nazarda tutadi. Bu bejiz emas.

1.Sigir

Ajdodlarimiz, asosan chorvachilik bilan shug‘ullanishgani hamda dasturxonini mol go‘shti va suti, ulardan tayyorlangan oziq-ovqat mahsulotlari bilan bezashgani bois sigirni ro‘zg‘orning baqqoli va bulog‘iga yo‘yishgan.

2. Tovuq

Ko‘pincha, oyog‘imiz ostida o‘ralashib, hamma yoqni titkilab yuradigan tovuqni o‘zingiz yaxshi bilasiz. U uzog‘i bilan 12 yil yashasa-da, 10 yil mahsulot beradi. Serpushtlari yiliga 220-250 ta, ayrimlari 365 tagacha tuxum qo‘yadi, vazni 1,7-2,2 kilogrammgacha tosh bosadi. Xo‘rozlaridan 2,7-3, tuxumdor-go‘shtdorlari va go‘shtdorlaridan 2,5-4,5 kilogacha parhez go‘sht olinadi. Qolaversa, bu parranda zararli hasharotlarni terib yeb, hovli-yu tomorqalarni tozalaydi.

3.Asalari 

Asalari esa o‘ta zahmatkash jonzot. Bitta oilasi bir mavsumda 140-150 kilogrammgacha asal to‘playdi. Uning o‘ndan yetti qismi o‘zlarining ta’minotiga sarflansa, qolgani inson ehtiyoji uchun ajratib olinadi. Eng hayratlanarlisi, asalarilar bir kilogram bol yig‘ish uchun ikki millionta gulga qo‘nib, nektar so‘radi. Shuning barobarida ekinlar va mevali daraxtlarni changlatadi. Ishchi asalarilar nektarni organizmida qayta ishlab hosil qiladigan va uya kataklarida o‘zlari uchun oziq sifatida g‘amlaydigan shirin suyuqlik, aniqrog‘i, asal ming bir dardga davo va to‘yimli ne’matlardandir.  

4. Ipak qurti

Bunday fikrlarni qimmatbaho to‘la beradigan ipak qurti, qadimda sholini oqlashda, zig‘ir, kunjut kabi o‘simliklardan shifobaxsh yog‘ olishda qo‘llanilgan objuvozu moyjuvoz, rizq-ro‘zimizning asosiy manbai sanalmish donni yanchib, unga aylantiradigan tegirmon, yog‘ochi binokorlik va duradgorlik materiallariga aylanadigan hamda ob-havoni tozalovchi daraxtlar haqida ham aytish mumkin.

5.Tegirmon 
Tegirmon nonini xalqimiz qadimdan iste’mol qilib kelgan, aziz deb bilgan. Xalqimiz uyiga mehmon kelsa, dasturxon yozib, avvalo, non qo‘yadi. O‘g‘il Vatan xizmatiga otlanganda safar oldidan nondek butun bo‘lgin, deya non tishlatadi. Yerga tushgan bir burda nonni ham ko‘ziga surib, olib qo‘yishdek o‘gitlar avloddan-avlodga uqtirib kelinadi. 

6. O‘rmon
Xalqimiz hayotida o‘rmonning (duradgorlik) ham ahamiyati juda katta. Zero, daraxtni imoratning suyagi, deb bejizga atashmaydi. Daraxt atmosferani tozalashga xizmat qiladigan muhim manbalardan sanaladi. Shunday ekan, undan oqilona foydalanish insoniylik burchlarimizdan biridir.

7. Objuvoz 
Objuvoz (yog‘-moy ishlab chiqarish) — qozonimizning qaynashi uchun beqiyos ne’matlardan. Qadim zamonlardan zig‘ir, kunjut yog‘ining shifobaxshligi haqida ko‘p va xo‘p gapirilgan. Ayniqsa, dunyoga mashhur palovimizni yog‘siz tasavvur etib bo‘lmaydi. Bugungi kunda dunyodagi istalgan mehmonxona yoki restoranning taomnomasida milliy taomlarimiz nomini uchratish oddiy holga aylanib bormoqda.