Joriy yilning 21-22-oktabr kunlari Toshkent davlat stomatologiya institutida “Stomatologiya Yuga – 2019” xalqaro olimpiadasi o‘tkazildi. Unda mutlaq g‘oliblik O‘zbekistonlik talabaga nasib etdi. Bu haqda Sog‘liqni saqlash vazirligi Jamoatchilik bilan aloqalar bo‘limi ma’lumot berdi.

MDH doirasidagi oliy ta’lim muassasalaridan yigirmaga yaqini qatnashgan mazkur olimpiadada O‘zbekiston tomonidan Buxoro, Samarqand va Andijon tibbiyot institutlari hamda Toshkent davlat stomatologiya institutidan vakillar ishtirok etdi. 

Olimpiadada tibbiyot oliy ta’lim muassasalarining yuqori kurslarida tahsil olayotgan 5 nafar talabadan iborat jamoalar bellashdilar. 

Olimpiada terapevtik stomatologiya, ortopedik stomatologiya, xirurgik stomatologiya, bolalar stomatologiyasi va ortodontiya yo‘nalishlarida olib borildi. Tanlovni xalqaro tajribaga ega bo‘lgan olimlar baholab bordi. 

Olimpiyadada Toshkent davlat stomatologiya instituti talabasi Diyora Isanova xalqaro olimpiadaning mutlaq g‘olibasi bo‘ldi. 

Bundan tashqari ushbu institut talabalari jamoasi tanlovda O‘zbekiston nomidan qatnashib, 2 ta 1-o‘rin, 2 ta 2-o‘rin, 1 ta 3-o‘rinni egalladi.

 Umumjamoa hisobida esa Kirov davlat tibbiyot universiteti va Kuban davlat tibbiyot universiteti yuqori o‘rinlarni egalladi. 

Olimpiada doirasida shuningdek, tibbiyot muassasalarining taqdimotlari va konferensiyalari ham o‘tkazildi.