Suriya armiyasi kuchlari mamlakat janubi-g‘arbida joylashgan Suvayda shahridan chekinishni boshladi. Bu haqda Sky News Arabia xabar berdi.

Nashr ma’lumotlariga ko‘ra, harbiylarning chekinishi shahar ichkarisida “mahalliy ichki xavfsizlik kuchlari” joylashtirilganidan so‘ng boshlangan.

Ma’lum qilinishicha, hukumat qo‘shinlarining mintaqadan olib chiqilishi druzlar bilan tuzilgan sulh bitimining bir qismidir. OAV xabarlariga ko‘ra, qo‘shinlar olib chiqilgach, davlat xavfsizlik kuchlari mintaqada qoladi – ular Suvayda yaqinidagi yo‘llarni nazorat qiladi. O‘t ochishni to‘xtatish kelishuvi doirasida chegara mintaqasida mojaro avj olishining so‘nggi bosqichida sodir etilgan huquqbuzarliklarni tekshirish uchun druzlar va rasmiy Damashq vakillarining qo‘shma qo‘mitasi ham tuziladi. 11-iyuldan beri davom etayotgan tartibsizliklar chog‘ida qo‘lga olingan druzlar va badaviylar qo‘yib yuborilishi, to‘qnashuvlarda bedarak yo‘qolganlar topilishi va’da qilingan.

“Biz jinoyat sodir etgan va bizning druzlarni haqorat qilganlarni javobgarlikka tortishga intilamiz, chunki ular davlat himoyasi ostida”, – degan Suriya rahbari Ahmad ash-Shara.

Ma’lumot uchun, iyul oyi boshida Suvayda shahrida druzlar va badaviylar o‘rtasida to‘qnashuvlar boshlangan edi. Ushbu vaziyat fonida Isroil druzlarni himoya qilish vaji bilan Damashqqa bir qator havo hujumlarini amalga oshirdi.

• Isroil
• Suriya
• hujum