Qaysi uy bekasi margarin haqida bilmaydi deysiz. Ba’zi ma’lumotlarga qaraganda, ushbu mahsulotning tarixi XIX asr boshlariga borib taqaladi. Ma’lum bo‘lishicha, “margarin” nomi ilk marta 1813-yilda, fransuz kimyogari Mishel Ejen Shevryol tomonidan ishlatilgan. Taxmin qilinishicha, u yangi mahsulotga yunoncha “marvarid” so‘zidan kelib chiqib, “margarin” nomini qo‘ygan. 

Buni qarangki, ushbu jarangdor nom kelajagini fransuzlar belgilab berdi. 50 yildan so‘ng imperator Napoleon III o‘z qo‘shini jangchilari uchun moy o‘rnini bosuvchi to‘yimli mahsulot ishlab chiqishni buyurdi. Shunda kashfiyotchilardan biri Ippolit Meje-Mure qattiq yog‘li iste’mol ozuqasi ishlab chiqib, uni “oleomargarin” deb nomladi. Va bu mahsulot fransuz askarlari taomnomasiga kiritildi. 

XIX asr oxiriga kelib, margarin amerikalik ishbilarmonlarning e’tiboriga tushdi. Tadbirkorlar butun Amerika bozorini margarin bilan ta’minlashga kirishib ketishdi. Qizig‘i shundaki, patentni mahsulotni ixtiro qilgan odam olmagan. Balki margarinni amerikalik biznesmen Genri Bredli 1871-yili 3-yanvarda patentlagan. 

Keyinchalik, Amerikaning ba’zi shtatlari rasmiylari margarinni sotishga cheklov qo‘ydi (eng qizig‘i bu hanuzgacha amal qilmoqda). Haqiqat shundaki, an’anaviy sut sanoati sariyog‘ o‘rniga alternativining paydo bo‘lishini qabul qila olmadi. Hatto yangi mahsulotni sotishni cheklovchi qonun qabul qilinishiga erishildi. Buni qarangki, ba’zi davrlarda margarin ishlab chiqaruvchilardan mahsulotga yoqimsiz va jirkanch ko‘rinish berish uchun pushti bo‘yoq qo‘shishni talab qiladigan qonunlar ham qabul qilindi.

XX asr oxirlariga kelib, margarin g‘arbliklar oziq-ovqat mahsulotlarining ajralmas qismiga aylandi. Yana bir muhim tomoni shundaki, 1923-yilda margarin tarkibiga to‘yinmagan yog‘li kislotalar Omega 3 va Omega 6 qo‘shishni kashf qilishgan va  olimlar ularni F vitamini deb atashgan. Keyinchalik, bu moddalar yurak-qon tomir tizimi uchun juda muhim ekanligi ma’lum bo‘ldi: masalan, ular ateroskleroz rivojlanishiga to‘sqinlik qiladi, qon aylanishini yaxshilaydi va yallig‘lanish jarayonlarini kamaytiradi. 

Margarinning tabiiy rangi oq bo‘ladi. Agar siz sariq rangli margarinni ko‘rgan bo‘lsangiz unga, albatta, rang beruvchi modda qo‘shilgan bo‘ladi. Hozirgi margarinlar eng avvalgi margarin ta’miga sira o‘xshamaydi. Endilikda uning mazasini yaxshilash uchun texnologlar quritilgan sut, zardob, tuz, shakar kabi turli xil shirin ta’m beruvchi narsalarni qo‘shmoqdalar.