Davlat test markazi majburiy fanlar bo‘yicha test topshiriqlarining aprobatsiya (tahlil qilish va tekshirish asosida rasmiy ravishda ma'qullash, tasdiqlash)sini o‘tkazmoqda.

Endilikda talabgorlar Davlat test markazining rasmiy veb-sayti orqali majburiy fanlar bo‘yicha test topshiriqlari namunalarini olishi va aprobatsiyada ishtirok etgan holda, o‘z bilimlarini sinab ko‘rishi mumkin.

Ro‘yxatdan o‘tish qay tartibda amalga oshiriladi

Buning uchun http://aprobatsiya.dtm.uz/ sayti orqali ro‘yxatdan o‘tiladi.

Ro‘yxatdan o‘tish juda sodda bo‘lib, talabgorlar o‘z shaxsiy ma’lumotlari bilan birga, test topshirish tili va variantlardan birini tanlashi hamda tasdiqlash kodini kiritishi talab etiladi.

Talabgorga chegaralangan vaqt beriladi

Talabgorlarga ona tili (o‘zbek, rus yoki qoraqalpoq tili), matematika va O‘zbekiston tarixi fanlarining har biridan 15 tadan jami 45 ta test topshiriqlari va 1 soat vaqt beriladi.

Test topshiriqlarini ishlab, kerakli javoblar belgilangandan so‘ng “Test sinovini tugatish” tugmasi bosilganda talabgorga qaysi fandan nechta to‘g‘ri javob topgani ko‘rsatiladi.

Uch tilda variantlar joylashtirilgan

Saytga o‘zbek, rus va qoraqalpoq tillarining har biridan 2 tadan variant joylashtirilgan.

Onlayn aprobatsiya bugun boshlandi

Onlayn aprobatsiya 10 kun davom etadi, ya’ni http://aprobatsiya.dtm.uz/ sayti 1-noyabrdan 10-noyabrgacha ochiq bo‘ladi va talabgorlar internet orqali istalgan joydan mazkur saytga kirgan holda, test savollari bilan tanishishi va o‘z bilimini sinab ko‘rishi mumkin.