Энергетика вазири Жўрабек Мирзамаҳмудов Ўзбекистонда энергия таъминотидаги узилишларга изоҳ берди. Унинг айтишича, ҳозирги об-ҳаво шароити янада режали ўчиришлар йўлга қўйилмаса, жиддийроқ талафотлар юзага келиши мумкин.

“Бизнинг вазифамиз – одамларнинг хонадонини газ билан таъминлаш, шунингдек, табиий газ ёрдамида иссиқлик электр стансияларида электр энергия ишлаб чиқариб, электр энергиясини етказиб беришдир. Тўғри, эътирозлар бор, ҳаммага ҳам етиб бормаяпти. Жуда кўп ўчишлар бўляпти. Буни биз тан оламиз, ҳеч ким инкор этмаяпти.

Шундай об-ҳаво шароитида режали, тизимли чекловлар киритган ҳолда вазиятдан чиқиб кетмасак, эртага бундан-да жиддийроқ талафот кўриш мумкин. Шунинг учун бундай кескин чоралар кўришга мажбурмиз”, – дейди Энергетика вазири.

Шунингдек, ижтимоий тармоқда Фарғонанинг Ўзбекистон туманидаги “Шўрсув цемент” ишчилари мурожаат билан чиқиб, заводда газ узиб қўйилгани ортидан ишсиз ва даромадсиз қолиб кетгани айтилган видеолар тарқалган эди. Вазир ушбу ҳолатга ҳам изоҳ берди.

“Фарғонадаги ҳолатга келадиган бўлсак, яна бир бор таъкидлаб ўтамиз, бошқа алтернатив ёқилғида ишлаши мумкин бўлган барча объектлар ҳаво кескин пайтда тармоқдан узилади. Бу ерда 10 мингта, деб бироз бўрттириб гапирилган. Бу цемент ишлаб чиқариш корхонасининг 10 мингта эмас, юздан сал ошиқроқ ишчилари бўлган.

Ҳамма биладики, Вазирлар Маҳкамасининг тегишли қарори бор, ғишт заводлари, янгидан қурилаётган цемент заводлар барчаси кўмир, яъни алтернатив ёқилғида ишлаши керак. Ҳозир бу заводни табиий газга ким улаган, ким рухсат берган, буни алоҳида ўрганиб чиқамиз. Лекин корхона раҳбарлари шартнома шартларига кўра вақтида огоҳлантирилган. Ишчилар билан тегишли тарғибот ишларини олиб бориши керак эди”, – деди Мирзамаҳмудов.

• Электр энергияси
• Энергетика_вазирлиги
• Газ