Самарқандга 4 тонна истеъмолга яроқсиз гўшт олиб кетаётган икки фуқаро ушланди. Бу ҳақда прокуратура Департaменти ҳабар берди.

Хабарга кўра, фуқаро О.Х. ва унинг шериги Ж.В. жами 4 000 кг истеъмолга яроқсиз қорамол гўшти юкланган Isuzu русумли юк автомашинасида “Қарши-Самарқанд” йўналишида ҳаракатланаётган бўлган. Бош прокуратура ҳузуридаги Департаментнинг Кўкдала туман бўлими томонидан ИИВ, ветеринария ва чорвачиликни ривожлантириш бўлими ходимлари билан ҳамкорликда ўтказилган тезкор тадбирда ушбу маҳсулотлар аниқланган ва ашёвий далил сифатида олинган.

Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.

• Жиноят
• Кодекс
• Самарқанд