Афғонистонни назорат қилаётган “Толибон” ҳаракати Қозоғистонда бўлиб ўтадиган Шанхай ҳамкорлик ташкилотининг навбатдаги саммитида иштирок этиш ниятида. Бу ҳақда Афғонистон Ташқи ишлар вазирлигининг бир кун аввал виртуал форматда бўлиб ўтган ШҲТ саммити муносабати билан қилинган баёнотида айтилади.

Толибон минтақада тотувлик ва хавфсизликка эришиш, ҳамкорликни кенгайтириш мақсадида бундай учрашувларни олқишлашини таъкидлади. Улар, шунингдек, ШҲТ саммитининг якуний декларациясининг эркин, барқарор, бирлашган, урушсиз ва наркотиклардан холи Афғонистонни барпо этиш қисмини қўллаб-қувватлашларини билдирдилар. Бундан ташқари, Афғонистон Ташқи ишлар вазирлиги афғонларга гуманитар ёрдам кўрсатиш ва қочқинларнинг қайтишига кўмаклашишни давом эттириш зарурлигини қайд этди.

Шу билан бирга, Толибон уларнинг ҳукумати инклюзив эмаслиги ҳақидаги даъволарга қўшилмаслигини билдирган. “Ислом Амирлигида ҳар хил тил, ирқ ва йўналишдаги одамлар бор”, –  дейилади баёнотда.

Кеча Шанхай ҳамкорлик ташкилоти Давлат раҳбарлари кенгашининг 23-саммити ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Покистон, Тожикистон, ШҲТ давлат раҳбарлари иштирокида виртуал форматда бўлиб ўтди. Эрон, Беларус ва Мўғулистон кузатувчи давлатлар, Туркманистон эса раиснинг меҳмони сифатида таклиф этилди. Афғонистон ташкилотда кузатувчи мақомига эга бўлишига қарамай, толиблар саммитга таклиф этилмаган.

• Афғонистон
• ШҲТ