Афғонистонда кузатилган кучли сел-сув тошқинларида зарар кўрган аҳолига кўмак кўрсатиш, уларни зарур воситалар ҳамда озиқ-овқат билан таъминлаш мақсадида Президентимизнинг топшириғига асосан, Ўзбекистон Республикаси номидан инсонпарварлик юклари карвони юборилди. Ушбу карвон “Айритом” чегара ўтказиш пункти орқали қўшни мамлакатнинг Балх вилоятига етказилган. Бу ҳақда, Сурхондарё вилояти ҳокимлиги хабар берди.

Шунингдек, инсонпарварлик ёрдами таркибидан 48 тонна ун, 22 тонна гуруч, 100 минг дона консерва ва 44 тонна макарон маҳсулотлари, 25 минг литр ўсимлик ёғи, 100 минг дона тез тайёрланадиган лағмон, шунингдек, 10 кишилик 100 та махсус қурилмали чодир ва 1 000 литрли 96 та сув сақлаш идишлари ўрин олган.

Хабар берилишича, Ҳайратон шаҳридаги Астрас компанияси ҳудудида Ўзбекистон Республикаси Президентининг Афғонистон бўйича махсус вакили Исматулла Иргашев ва Сурхондарё вилояти ҳокимининг биринчи ўринбосари Шерзод Ражабов ҳамда Афғонистоннинг Балх вилояти расмийлари иштирокида инсонпарварлик ёрдамларини топшириш маросими бўлиб ўтди.

Афғонистон томони вакиллари Президентимиз ва халқимизга оғир пайтда кўрсатилаётган ёрдам учун ўз миннатдорликларини билдиришди.

• Афғонистон
• Гуманитар ёрдам
• Ҳокимлик
• Сурхондарё