Бугунги мавзумиз асли ўзбекистонлик бўлган миллирдер Алишер Усмонов ҳақида. Украинада уруш ҳаракатлари бошлангач, ЕИ ва АҚШ Алишер Усмоновга нисбатан санксиялар эълон қилди. Forbes нашри эса миллиардернинг асосий эътиборини Ўзбекистонга қаратаётганлиги ва мамлакатга киритаётган сармоялари ҳиссасини икки карра оширганлиги ҳақида ёзмоқда.

Алишер Усмонов Россиянинг Украинага қарши ҳаракатлари сабабли бошқа россиялик миллиардерлар қаторида Ғарб санксияларига дуч келди. Бу орада Алишер Усмонов ўз асосий эътиборини она ватани - Ўзбекистонга қаратмоқда, дея ёзади Forbes нашри.

“Менга қарши санксиялар ноҳақ ва асоссиз айбловларга асосланган. Шахсий маблағларни хайрия қилиш ва инвестисияларни жалб қилиш қийинроқ: аслида бу чекловлар нафақат менга, балки ёрдамимга муҳтож бўлган барча одамларга ҳам таъсир қилди. Шунинг учун менинг ҳозирги вазифам уларга ёрдам беришдир”, - деди Алишер Усмонов.

“Ҳозирда Ўзбекистон иқтисодиёти йилига 7% га ўсмоқда, у ҳозиргача Марказий Осиёдаги энг кўп аҳолига эга ва ёш, ўсиб бораётган аҳолига эга мамлакатдир ҳамда бошқа қўшни бозорларидан фарқли ўлароқ, иқтисодиёти яхши диверсификацияланган”, - дейди ҳозирда Ўзбекистонда жойлашган “Bluestone” кичкик инвестицион банки ҳамкори Куинн Мартин.

“Бир неча йиллар аввал мен бу ерда на яшай ва на ишлай олардим. Аммо бугун мен ўз мақсадимни Ўзбекистоннинг салоҳиятини тўлиқ рўёбга чиқаришга ёрдам бериш деб биламан. Бу мамлакатда иқтидорли ва меҳнаткаш одамлар талайгина”, - дейди у ва Мирзиёев Ўзбекистонни дунёга олиб чиқиш учун “бор кучини” сарфлаётганини ҳам қўшимча қилади.

“Пахтани қайта ишлаш, мева-сабзавот етиштириш, шунингдек, мамлакатнинг тоғ-кон ресурсларини ўзлаштириш, хусусан, рангли металл рудаларини қазиб олиш ва қайта ишлаш сармоя киритиш учун энг қизиқарли йўналишлардир”, - дейди Усмонов.

“Ўзбекистонга сармоя киритиш яқинда “Берлин девори қулаши”ни бошидан кечирган мамлакатга сармоя киритиш каби мисли кўрилмаган имкониятдир: бу ёпиқ сосиалистик давлатдан бозор иқтисодиётига тез ва кенг миқёсда ўтиш каби ҳолат”, - дейди Лондондаги “Sturgeon Capital” ҳамкори Алекс Брантон.

“Ўйлайманки, ҳозир инвесторлар учун Ўзбекистон бозорига кириш учун қулай вақт. Мен ҳаммани бу ерга сармоя киритишга чорлайман. Мен акциядор бўлган компаниялар бу ерда металлургия, семент ишлаб чиқариш ва телекоммуникация соҳаларига сармоя киритмоқда”, - дейди Алишер Усмонов, ва ишлаб топган барча пуллари Ўзбекистонда қолишини ҳам қўшимча қилади.

• Алишер Усмонов
• Ўзбекистон
• миллиардерлар