Шавкат Мирзиёев 18 сентябрь куни Нью-Йоркда Американинг йирик компаниялари вакиллари билан учрашди, деб хабар қилди президент матбуот хизмати.

Air Products, Cintana, CNH, Cerberus компаниялари раҳбарлари билан энергетика, таълим лойиҳалари, қишлоқ хўжалиги техникаси ва тоғ-кон саноати соҳасида музокаралар олиб борилди. Компаниялар Ўзбекистонда ўн миллиард долларлик дастурларни амалга оширишга келишиб олдилар.

Шунингдек, GE HealthCare компанияси билан ҳам музокаралар бўлиб ўтди, улар кўмагида Ўзбекистонда кардиографлар, скрининг дастурлари ва юрак-ахборот тизимини ишлаб чиқаришни йўлга қўйишади. Бундан ташқари, инвестор Тиббиёт маълумотлари миллий архивини яратишда иштирок этиш ниятида.

Шавкат Мирзиёев АҚШ-Ўзбекистон савдо палатаси раиси Керолин Лемм билан учрашди. Учрашувда Америка бизнесининг Ўзбекистондаги фаолиятини кенгайтириш бўйича аниқ режалари муҳокама қилинди.

• АҚШ
• Иқтисодиёт
• Ўзбекистон