Андижон вилоятининг Хонобод шаҳрида шу йилнинг 29-30-31 июль кунлари бўлиб ўтган “Дунё садолари” халқаро миллий эстрада санъати фестивалига жами 6 миллиард сўм маблағ сарфланган. Бу ҳақда вилоят матбуот хизмати маълумот берди.

Қайд этилишича, Халқаро фестиваль давомида Хонобод шаҳрига маҳаллий ва хорижий ташриф буюрувчилар сони 2,5 баробарга (2 млн нафар) ортган.

Шунингдек, тадбиркорлик субъектларида тушум кескин ортган. Жумладан, 2024 йилнинг 7 ойи давомида тушум 48 миллиард сўмни ташкил қилиб, (шундан 29-30-31 июль кунлари 8,5 миллиард сўмга етган) ўтган йилнинг мос даврида нисбатан 2 баробарга ортган.

Таъкидланишича, бу кўрсаткичлар Хонобод шаҳридаги тадбиркорлик субъектларининг ва аҳолининг даромади ошганлигини кўрсатади.

Савдо ва хизмат кўрсатиш фаолияти билан шуғулланувчи тадбиркорлар сони ўтган 2023 йилда 48 тани ташкил этган эди. 2024 йилдаги халқаро тадбир давомида доимий фаолият олиб борувчи тадбиркорлик фаолиятлари сони 230 тага кўпайиб, қарийб 5 баробарга ортган.

Меҳмонларга хизмат кўрсатувчи дала ҳовли ва уй-меҳмонхоналаридаги ётоқ жойлар сони 1900 тани ташкил қилган бўлса 2024 йилда бу рақам 6 мингдан ортган.

Бундан ташқари, аҳоли даромадларини ошириш, иш билан таъминлаш ва кам даромадли фуқароларнинг даромадини оширишда “Сайхунобод”, “Уйчи” тажрибаси асосида 600 дан ортиқ хонадонларда уй-меҳмонхоналар ташкил этилган.

• Андижон
• фестиваль