The Washington Постъга кўра, Трамп маъмурияти томонидан тайёрланган Ғазо секторининг урушдан кейинги ривожланиши режаси ушбу ҳудудни камида 10 йил давомида АҚШ назорати остига ўтказишни назарда тутади. Бу вақт ичида сектор гуллаб-яшнаётган туристик курортга ва юқори технологияли ишлаб чиқариш марказига айланиши керак.

“38 саҳифалик режа Ғазо секторининг икки миллион аҳолисини камида вақтинча кўчиришни кўзда тутади. Қайд этилишича, бу ё бошқа мамлакатга “ихтиёрий” кетиш йўли билан ёки тикланиш даврида одамларни сектордаги хавфсиз зоналарга жойлаштириш орқали амалга оширилади. Ер эгаларига реконструкция қилиш ҳуқуқи эвазига рақамли токенлар таклиф этилади. Ушбу активлар бошқа жойдаги ҳаётни молиялаштириш учун ишлатилиши ёки кейинчалик Ғазо секторида ташкил этиладиган “ақлли шаҳар”лардан биридаги квартирага алмаштирилиши мумкин”, – дейилади нашр мақоласида.

Шу билан бирга, Ғазо секторини тарк этишга қарор қилган ҳар бир фаластинликка 5000 доллар миқдорида нақд пул, шунингдек, тўрт йиллик ижара ва бир йиллик озиқ-овқат учун тўловлар берилади.

Ушбу режа асосида Ғазо секторини реконструкция қилишни бошқарадиган Ғазони қайта қуриш, иқтисодий жадаллаштириш ва ўзгартириш (ГРЕАТ Trust) деб номланган мақсадли жамғарма ташкил этилади. Ғазони реконструкция қилиш режасининг асосий элементлари Доналд Трампнинг ҳудуд ҳақидаги “Яқин Шарқ Ривераси” қарашини акс эттиради. Режа давлат ва хусусий маблағлар ҳисобидан молиялаштирилиши кутилмоқда.

• АҚШ
• Фаластин
• Трамп
• reja