Тошкент вилояти ва Тошкент шаҳрида ўтказилган назорат тадбирларида атмосфера ҳавосини ифлослантирган 46 та иссиқхона фаолияти тўхтатилди, 37 та иссиқхона эгаси жаримага тортилди. Бу ҳақда Экология вазирлиги матбуот хизмати хабар берди.

Матбуот хизмати маълумотларига кўра, яна 426 иссиқхона эгалари атроф-муҳит стандартларига жавоб берадиган чанг ва газ тозалаш ускуналарини ўрнатиш зарурлиги, шунингдек, резина қолдиқлари каби чиқиндиларни ёқилғи сифатида ишлатмаслик тўғрисида огоҳлантирилган.

Давлат экологик назорат инспекцияси мутахассислари Тошкент вилоятининг Зангиота, Қибрай, Тошкент туманларида, шунингдек, Тошкентнинг Мирзо Улуғбек, Яшнобод, Бектемир ва Олмазор туманларида ҳаво ифлосланишини таҳлил қилдилар.

Мониторинг доирасида 486 та иссиқхонада тадқиқот ва тушунтириш ишлари олиб борилди. Маълум бўлишича, ишлайдиган 440 иссиқхонадан 46 таси мавсумий ва қозонхоналар билан жиҳозланмаган. Зангиота туманида 16 та, Қибрай туманида 10 та, Тошкент туманида 4 та, Юнусобод туманида 11 та, Мирзо Улуғбек туманида 5 та шундай иссиқхона аниқланган.

• Issiqxona
• Ўзбекистон
• Тошкент
• Toshkent viloyati