Эрондаги норозилик намойишлари кундан кунга авж олиб бормоқда. Аёллар 22 ёшли талаба қиз – Маҳса Аминининг ўлими ортидан норозилик рамзи сифатида рўмолларини ечиб, сочларини кесишяпти. Намойишлар "Аёллар, ҳаёт, озодлик!" шиори остида ўтказилмоқда. Эрон ҳукумати норозилик намойишларини бостириш учун мамлакатнинг бир қатор ҳудудларида интернетга кириш имкониятини чеклаб қўйди. Ғарб мамлакатлари талаба қизнинг ўлими учун Эрон ҳукуматини кескин қоралади, АҚШ Молия вазирлиги эса қизнинг ўлимига алоқадор деб ҳисобланган ҳарбийларга қарши санкциялар киритди.

Сўнгги 5 кун ичида Эроннинг бир қанча шаҳарларида норозилик намойишларида иштирок этган 30 дан ортиқ фуқаро ҳалок бўлган.

Маҳса Амини ўтган ҳафта Теҳронда ахлоқ полицияси томонидан ҳибсга олинган. Бунга унинг сочларни ҳижоб ёки рўмол, қўл ва оёқларни кенг кийим билан ўрашни талаб қилувчи қонунни бузганлик айблови сабаб бўлган. Қиз ҳибсга олинганидан кейин орадан 3 кун ўтиб вафот этган. Ўлим сабаби сифатида «юрак» етишмовчилиги қайд этилган, марҳуманинг қариндошлари эса унинг юраги билан боғлиқ ҳеч қандай муаммо бўлмаганини таъкидлашган. Қизнинг ўлимига унинг полиция ходимлари томонидан калтаклангани сабаб бўлган дея тахмин қилинмоқда.

Норозилик намойишлари тўлқини Эроннинг 100 дан ортиқ шаҳарлари ва 30 дан ошиқ вилоятига тарқалди. Акция иштирокчилари полиция ва ҳукумат биноларига ўт қўймоқдалар. Ҳуқуқ-тартибот идоралари ходимлари эса намойишчиларга қарши курашда кўз ёш оқизувчи воситалардан фойдаланишяпти, оломонга қарата ўқ узиш ҳолатлари ҳам кузатилган. Норозилик намойишларини бостиришга уриниш вақтида 5 нафардан ортиқ полиция ходими ҳалок бўлган.

БМТ Эрон ҳукуматини тинч намойишлар ўтказишга рухсат бериш ва Маҳса Аминининг ўлими юзасидан холис тергов жараёнини бошлашга чақирди. Эрон разведка вазирлиги эса норозилик намойишларида иштирок этиш қонунга қарши чиқиш эканлиги ва барча намойишчиларни жавобгарлик кутиб турганини таъкидлади.

• Eron
• Жаҳон
• Намойиш
• norozilik
• хабар