Ўзбекистон Бош консулхонаси кўмагида Дубайдаги “Ал Рашид” шифохонасида қийин аҳволга тушиб қолган ва консуллик-ҳуқуқий ёрдамга муҳтож бўлган юртдошимиз О.К. ватанга қайтарилди. Бу ҳақда “Дунё” АА хабар бермоқда.

Бош консулхона маълумотига кўра, ватандошимиз соғлигида кузатилган муаммолардан шикоят қилиб, “Ал Рашид” шифохонасига ётқизилган. Муолажа давомида у 17 минг 835 АҚШ доллари ва БАА ҳудудида узрли сабаб билан бўлса-да ноқонуний қолгани учун 4 минг 550 АҚШ доллари миқдорида қарз бўлган. Шу сабабли О.К.га мазкур шифохона ва БААни тарк этиш учун тақиқ қўйилган.

Вужудга келган муаммони яқиндан ўрганиш ва бартараф этиш мақсадида дипломатлар “Ал Рашид” шифохонаси ҳамда Бирлашган Араб Амирликлари ҳуқуқни муҳофаза қилувчи органлари вакиллари билан музокара олиб борган.

Музокаралар натижасида БАА томони ҳамюртимизнинг барча қарзларидан воз кечди ва Ўзбекистонга қайтишига изн берди.

Бош консулхона ва Амирликлардаги “Аёллар ва болаларга ёрдам кўрсатиш маркази” хайрия ташкилоти томонидан О.К.га “Дубай – Тошкент” авиақатновига чипта сотиб олинган. Шундан сўнг, 15 ноябрь куни соғ-саломат Ўзбекистонга қайтган.

• БАА
• Konsullik