Таиланднинг Паттая шаҳрида бадиий гимнастика бўйича ўтказилган қитъа биринчилиги якунланди.

Бадиий гимнастика бўйича Ўзбекистон терма жамоаси қитъа биринчилигининг сўнгги кунида 6 та олтин ва 3 та кумуш медалларни қўлга киритди.

Кечаги кун Тахмина Икромованинг бенефисига айланди дейиш мумкин. Спортчимиз ҳалқа, тўп ва булава машқларида тенгсиз, деб топилди.

Шунингдек, яна бир таниқли вакиламиз Сабина Ташкенбаеванинг тўп билан амалга оширган дастури кумуш медалга лойиқ кўрилди.

Гуруҳ машқида 3 тасма ва 2 тўп билан ўз дастурини ижро қилган қизларимиз ҳам қитъамиз вакилалари орасида энг юқори кўрсаткични қайд этишди.

Жамоамиз ҳисобига яна 2 та олтин медални ёшлар тоифасида Эвелина Аталянснинг булава, Вилана Савадяннинг эса тасма билан чиқиши келтирди.

Гуруҳ машқида 5 тўп билан ўз чиқишларини намойиш этган қизларимиз эса шоҳсупанинг иккинчи поғонасига кўтарилишди.

Шу тариқа, Ўзбекистон терма жамоасининг мазкур қитъа биринчилигида жамғарган медаллари 10 та олтин, 5 та кумуш ва 2 та бронзани ташкил этмоқда.

Ўзбекистон Миллий Олимпия қўмитаси Ўзбекистон гимнастика федерацияси ва бадиий гимнастика бўйича терма жамоамизни қитъа биринчилигида эришган ушбу ютуғи билан қутлаб қолади.

• Бадиий гимнастика
• Ўзбекистон