Бугун, 5 август куни минглаб одамлар Бангладеш бош вазири Шайх Хасинанинг “Ганобҳабан” қароргоҳига бостириб киришган.

Бош вазир эса истеъфога чиққанини эълон қилиб, ҳарбий вертолётда мамлакатдан қочиб кетган. Бу ҳақда Reuters хабар берди.

Қайд этилишича, у Финляндияга учиб кетиши мумкин. Бошқа маълумотларга кўра, у синглиси билан Ҳиндистонга учиб кетиши мумкинлиги ҳам айтилган. Бироқ унинг қаерда эканлиги ҳозирча номаълум.

Айни вақтда давлатни ким бошқараётгани ҳам маълум эмас. Шу боис, вақтинча ҳукумат тузилади, бу ҳақда мамлакатдаги сиёсий партиялар билан музокаралардан кейин армия штаби бошлиғи, генерал Вакар-уз-Замон маълум қилди.

Маълумот учун, намойишлар талабаларнинг ҳукумат ишлари учун квота тизимини тугатишга интилиши билан бошланди, бироқ полиция ва ҳукуматпараст фаоллар билан тўқнашувлар зўравонликларга айланиб кетди.

Эслатиб ўтамиз, Бангладешдаги ҳукуматга қарши намойишларда ҳозирча 48 киши ҳалок бўлди.

• Bangladesh