“Тошкент вилояти Бекобод шаҳрида 11-синф ўқувчисининг ўлимида жами 5 нафар ўсмир гумонланиб ҳибсга олинди”, – дея хабар бермоқда Бош прокуратура матбуот котиби Ҳаёт Шамсутдинов.

Маълум қилинишича, бир неча вояга етмаган шахс ўртасида келиб чиққан оғзаки жанжал давомида улардан бири ошхона пичоғи билан жабрланувчининг ўнг ва чап кўкрак қисмларига жароҳат етказган. Жабрланувчи тиббиёт муассасасига олиб борилган бўлса-да, кўрсатилган тиббий ёрдамга қарамасдан, вафот этган.

Бош прокуратура 11 март куни ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилгани ва гумонланаётган вояга етмаган шахс процессуал тартибда ушланганини хабар қилганди.

12 март куни иш доирасида жами 5 нафар гумонланувчи вояга етмаган шахсга нисбатан қамоққа олиш тарзидаги эҳтиёт чораси қўллангани маълум бўлди. Ҳозирда тергов ҳаракатлари давом этмоқда.

Kun.uz билан суҳбатлашган вафот этган ўқувчининг яқинларига кўра, болалар низолашгандан кейин бошқа мактаб ўқувчилари 5 киши бўлиб келган. Уларнинг 3 нафари шаҳардаги 3-мактабнинг, 2 нафари эса техникум ўқувчилари бўлган.

• Бекобод
• Бош прокуратура
• Жиноят
• Қотиллик
• Toshkent viloyati