Айни вақтда Администрация раҳбари раислигидаги Республика штаби йиғилиши давом этмоқда.

Сардор Умрзоқов соҳадаги камчиликларни жиддий танқид остига оляпти.

"Бизга келган маълумотларга кўра, "Ўзтрансгаз"га қарашли компрессор станцияларида ҳам жиддий камчиликлар мавжуд. Жами 37 та агрегатдан 21 таси таъмирталаб.

Жўрабек Турсунпўлатович (энергетика вазири), Бекзод Рахматуллаевич ("Ўзтрансгаз" раҳбари) барча агрегатлар зудлик билан ишчи ҳолатига келтирилиши зарур. Носоз агрегатлар бошқа қурилмалар зўриқиш билан ишлашига олиб келиб, техник носозликлар келиб чиқишига ва истеъмолчиларни барқарор табиий газ билан таъминлаш имконини йўққа чиқаради" – деди Умрзоқов.

Администрация раҳбари аҳолининг эътирозига сабаб бўлаётган масалаларга ҳам алоҳида тўхталиб ўтди.

"Ҳудудларда йўл қўйилган чеклов ва юз берган авариялар оқибатида электр энергиясининг узилиши аҳолининг эътирозига сабаб бўлмоқда.

Масалан, Бухоро, Навоий, Фарғона ва Тошкент шаҳрида 1485 та маҳалла куннинг маълум бир вақтида электр таъминотисиз қолган.

Улуғбек Мавланович ("Ўзбекенерго" АЖ раиси), республика ҳудудларида аварияларни бартараф қилиш бўйича бригадалар сонини кўпайтириш ва аварияларни тўлиқ бартараф этиш чораларини кўрсин", – деди Администрация раҳбари.

• Электр энергияси
• Газ
• Президент Администрацияси
• Сардор Умрзақов