Бразилия Олий суди собиқ президент Фернандо Афонсу Колор ди Мелуни коррупция ва пул ювишда айблаб, 8 йилу 9 ойга озодликдан маҳрум қилди.

Аввал хабар берганимиздек, 2010 – 2014 йилларда Алагоас штати сенатори бўлиб ишлаган Колор ди Мелу қурилиш компанияларидан бири билан шартномалар тузиш эвазига Петробрас давлат нефть компанияси шўъба корхонасидан умумий қиймати 4 миллион доллар миқдорида пора олганликда айбланган.

Суд ҳужжатларига кўра, собиқ давлат раҳбари ўзининг сиёсий таъсиридан Петробрас шўъба корхонаси Distribuidora директорлар кенгашига номзодларни илгари суриш ва шартномалар учун шароит яратишда фойдаланган.

Фернандо Афонсу Колор ди Мелу 1989 йилда ҳарбий диктатура тугаганидан кейин демократик сайловлар орқали сайланган биринчи Бразилия президенти бўлган.

90-йилларнинг бошларида Колор ди Мелу коррупцияда айбланган, 1992 йилда Бразилия Конгресси импичмент жараёнини бошлаган. Ушбу масала бўйича овоз беришдан бироз олдин президент истеъфога чиқди. Шунга қарамай, овоз бериш бўлиб ўтди, Колор ди Мелу эса саккиз йилга сиёсатдан четлаштирилди.

2006 йилда собиқ президент Алагоас штати сенатори этиб сайланган. У 2015 йилда Бразилия Бош прокурори томонидан коррупцияда айбланган, бироқ 2023 йил февралигача сенатор бўлиб ишлади.

• Braziliya
• Президент
• Суд