Трамп аввал Путин билан сўнгра Зеленский билан телефонлашди.

Россия Президенти Владимир Путин кеча, 12 февраль куни Америка Қўшма Штатлари етакчиси Доналд Трамп билан телефон орқали мулоқот ўтказди. Икки давлат раҳбарларининг телефон орқали мулоқоти ҳақида Россия Президенти матбуот котиби Дмитрий Песков брифингда маълум қилган.

Таъкидланишича, ушбу мулоқот Россия ва АҚШ раҳбарларининг сўнгги уч йилдаги илк суҳбати бўлган.

“Президент Путин ва АҚШ Президенти Доналд Трамп яқинда телефон орқали мулоқотни якунлади. Бу жуда узоқ телефон суҳбати эди, деярли бир ярим соат давом этди”, – деган Песков брифингда.

Қайд этилишича, Трамп сўнгги ҳафталарда Россия Президенти билан гаплашиш режаларини бир неча бор таъкидлаган. Ҳозирда Америка раҳбари Украинадаги можарога катта эътибор қаратган ва уни тугатишга ёрдам бериш истагини билдирган.

Суҳбат давомида Россия Президенти эса Трампнинг Москва ва Вашингтон биргаликда ишлаши кераклиги ҳақидаги фикрига қўшилишини айтган.

Маълум бўлишича, Россия ва АҚШ етакчилари телефон суҳбатида Яқин Шарқдаги келишув, Эрон ядро дастури ва Россия-Америка муносабатларини муҳокама қилган.

Кремль вакилининг сўзларига кўра, Россия етакчиси АҚШ Президентини Москвага таклиф қилган. Путин ва Трамп шахсий учрашув ташкил этишга келишиб олган.

Путин Трамп билан суҳбатда америкалик расмийларни Россияда қабул қилишга, жумладан, Украина муаммосини ҳал қилишга тайёрлигини маълум қилган.

Бундан ташқари, АҚШ Президенти Доналд Трамп 12 февраль куни Россия етакчиси Владимир Путин билан суҳбатлашганидан сўнг Украина Президенти Владимир Зеленский билан ҳам телефон орқали мулоқот қилган. Бу ҳақда Трамп ўзининг Truth Social тармоғида маълум қилмоқда.

Америка етакчиси телефон мулоқотини яхши ўтди деб баҳолаган.

“Мен ҳозиргина Украина Президенти Владимир Зеленский билан суҳбатлашдим. Суҳбат жуда яхши ўтди. У ҳам, Президент Путин ҳам тинчликка эришишни истайди. Биз уруш билан боғлиқ кўплаб мавзуларни муҳокама қилдик, бироқ асосан жума куни Мюнхенда бўлиб ўтадиган учрашув ҳақида гаплашдик. Делегацияга витсе-президент Жей Ди Венс ва Давлат котиби Марко Рубио раҳбарлик қилади. Умид қиламанки, ушбу учрашув натижалари ижобий бўлади. Бу бемаъни урушни тўхтатиш вақти келди, у беҳисоб ва мутлақо кераксиз ўлим ва вайронагарчиликларга сабаб бўлди. Худо Россия ва асрасин!” – деб ёзди Трамп.

Зеленскийнинг маслаҳатчиси Дмитрий Литвиннинг сўзларига кўра, Трамп ва Зеленский тахминан бир соат давомида суҳбатлашган. Зеленский телефон суҳбати юзасидан изоҳ берар экан, Трамп уни Россия Президенти билан аввалроқ бўлиб ўтган музокаралар ҳақида хабардор қилганини маълум қилган.

• АҚШ
• Путин
• Трамп
• Зеленский