Бу уруш Исроил ва Фаластин ўртасидаги уруш эмас, балки бутун дунё бўйлаб золимлар ва мазлумлар ўртасидаги курашдир. Бу ҳақда Туркия ташқи ишлар вазири Хакан Фидан Гамбия пойтахти Банжулда бўлиб ўтган Ислом ҳамкорлик Ташкилотининг 15-саммитида сўзлаган нутқида маълум қилган.

“Ҳеч биримиз фаластинликларнинг қони орқали муаммоларимиз ёки рақобатимизни ҳал қилишга ҳаққимиз йўқ”, – деган Туркия вазири.

Ташқи ишлар вазирлиги раҳбари, агар Исроил Рафаҳ бўйича режаларини амалга ошира олса, дунё таърифлаб бўлмайдиган даражада яна бир фалокатга гувоҳ бўлишини таъкидлаган.

Унинг сўзларига кўра, Исроил жавобгарликка тортилиши керак бўлса ҳам, жазосиз қолмоқда.

“Бу бизнинг синовимиз. Биз бирлашишимиз кераклигини исботлашимиз керак. Биз Ислом дунёси дипломатик каналлар ва керак бўлганда мажбурий чоралар орқали натижаларга эришиши мумкинлигини кўрсатишимиз керак. Ислом тарихи ҳалокатли можароларга тўла. Бугун биз бу хатоларни такрорлай олмаймиз. Фаластин иши минтақавий рақобатга қурбон бўлиши мумкин эмас. Ҳеч биримиз фаластинликларнинг қони туфайли муаммоларимиз ёки рақобатимизни ҳал қилишга ҳаққимиз йўқ. Агар Ислом оламининг бирдамлиги ва бирлиги йўқолса, ягона ғолиб Исроил ва унинг тарафдорлари бўлади”, – дея таъкидлаган вазир.

• Фаластин
• Gambiya
• Isroil
• Tashqi ishlar vazirligi
• Туркия