Жорий йил 29 июнь куни БМТ Бош котиби Антониу Гутерриш Марказий Осиё мамлакатларига ташриф буюришни бошлайди. Бу ҳақда Нью-Йоркдаги брифингда унинг матбуот котиби Стефан Дюжаррик хабар берди.

Гутерришнинг Ўзбекистон, Қирғизистон, Қозоғистон, Тожикистон ва Туркманистонга ташрифи белгиланган. Охирги марта у 2017 йилда ушбу минтақага ташриф буюрган.

Хабар берилишича, БМТ Бош котиби ҳар бир мамлакатда давлат раҳбари ва ҳукуматнинг бошқа юқори мартабали вакиллари билан учрашади. Шунингдек, иқлим ўзгаришига қарши кураш билан боғлиқ лойиҳалар билан танишади ва маҳаллий фаоллар билан мулоқот қилади. Марказий Осиё давлатларига ташрифнинг биринчи манзили эса Ўзбекистон ҳисобланади.

Қайд этилишича, Бош котиб 4 июль куни Остона шаҳридаги Шанхай ҳамкорлик ташкилоти саммитида иштирок этади. Гутерриш халқаро ҳамжамиятни геосиёсий келишмовчиликлар ва умумий таҳдидлар, шунингдек иқлим ўзгариши ҳақида огоҳлантирмоқчи.

Антонио Гутерриш 7 июль куни Нью-Йоркка қайтади.

• БМТ
• Ташриф