Бугун, 14 сентябрь куни Самарқандга БМТ Бош котиби ўринбосари, Эрон ва Қирғизистон президентлари ҳамда Хитой Халқ Республикаси Раиси ташриф буюради. Бу ҳақда президент матбуот котиби Шерзод Асадов иштирокида бўлиб ўтган брифингда маълум қилинган.

“Хусусан, ҳозиргина илк меҳмонимиз – Мўғулистон Президенти Ухнаагийн Хурелсух Самарқандга етиб келди. Шунингдек, айни дақиқаларда Бирлашган Миллатлар Ташкилоти Бош котиби ўринбосари Розмари Ди Карлонинг ташрифи кутилмоқда”, – деди президент матбуот котиби.

Шунингдек, бугун Эрон Ислом Республикаси Президенти Иброҳим Раисийнинг расмий ташрифи кутилмоқда.

“У Самарқандга тушдан сўнг етиб келади, олий даражадаги музокаралар бугуннинг ўзида бўлиб ўтади. Учрашув якунида савдо, кооперация, инновациялар, транспорт, энергетика, туризм ва бошқа йўналишларда ҳужжатлар имзоланиши режалаштирилган”, – деди Шерзод Асадов.

Бугун куннинг иккинчи ярмида Хитой Халқ Республикаси Раиси Си Сзинпин ва Қирғиз Республикаси Президенти Садир Жапаров ҳам Самарқандга етиб келади.

Қолган барча меҳмонлар ташрифи эртага, 15 сентябрь куни кутилмоқда.

“Бу куни кўплаб икки томонлама музокаралар режалаштирилган. Кечга яқин ШҲТ саммитининг норасмий тадбирлари бошланади. Асосий тадбир эса 16 сентябрь куни Ўзбекистон Республикаси Президенти Шавкат Мирзиёев раислигида янги туризм марказидаги “Конгресс-хол”да бўлиб ўтади”, – дея қўшимча қилган президент матбуот котиби.

Асадовнинг фикрича, Самарқанд саммити дозларб минтақавий ва глобал мавзуларга бой кун тартибига эга бўлиши, унинг якунлари бўйича ШҲТ доирасида кўп томонлама ҳамкорликни янада кучайтириш имконини берувчи муҳим, қолаверса, тарихий аҳамият касб этувчи қарорлар ва ҳужжатлар бўлиши кутилмокда. Саммит ШҲТ ўзаро боғлиқликдаги дунёда очиқ ва кенг ҳамкорликни илгари сурувчи, давлатлар ўртасида дўстона, ўзаро тенг ҳуқуқли ва манфаатли серқирра алоқаларни кенгайтиришга хизмат қилаётган нуфузли ташкилот эканлигини тасдиқлайди.

• Самарқанд
• ШҲТ
• Sherzod Asadov