Бугун, 23 январь куни Покистон Ислом Республикасида миллий электр тармоғидаги носозлик туфайли эрта тонгдан қувват узилиши содир бўлди. Бу ҳақда мамлакат Энергетика вазирлиги ўз Тwitter саҳифасида маълум қилди.

Қайд этилишича, мамлакатнинг барча йирик шаҳарларида, жумладан, Карачи, Исломобод, Лаҳор ва Пешоварда электр таъминоти узилган.

Покистон Энергетика вазири Хуррум Дастагирнинг маълум қилишича, тармоқдаги носозлик Покистон жанубидаги “частота ўзгариши” ортидан содир бўлган. Унинг таъкидлашича, бу “катта инқироз эмас” ва ҳокимият тез орада муаммони бартараф этади.

Покистон Энергетика вазирлиги баёнотида электр таъминоти маҳаллий вақт билан тахминан 07:34 да узилгани ва тизимни қайта тиклаш учун тезкор иш олиб борилаётгани маълум қилинган.

Шунингдек, вазир Дастагир ўз интервюсида мамлакатдаги айрим тармоқлар аллақачон тиклангани ва 12 соат ичида электр қуввати тўлиқ тикланишини айтган.

• Электр энергияси
• Покистон