BBC 2024 йил учун дунёнинг 100 нафар илҳомлантирувчи ва таъсирли аёллар рўйхатини эълон қилди. Қувонарлиси, ушбу рўйхат таркибида тинчлик бўйича Нобел мукофоти совриндори Надя Мурад, актриса Шерон Стоун қаторида ўзбекистонлик тадбиркор Дилором Йўлдошева ҳам бор.

Маълум бўлишича, икки йил аввал Дилором Йўлдошева бахтсиз ҳодиса оқибатида иккала оёғини йўқотган. Шундан сўнг у умидсизликка тушмади ва ўзининг тикувчилик бизнесини очди. Ишчилар ва мактаб ўқувчилари учун кийим тикиш бўйича шартномалар тузиб, ўзи ва ўнлаб бошқа аёлларни даромад билан таъминлади.

“Дунёнинг 100 нафар аёли” лойиҳаси шуни кўрсатмоқдаки, дунёнинг турли бурчакларидаги аёллар дуч келаётган барча қийинчиликларга қарамасдан, уларнинг кўпчилиги ўз зиммасига етакчилик вазифасини олиб, жамиятдаги ўзгаришлар учун курашишни давом эттирмоқда.

Адлия вазирлиги ахборот хизматидан маълум қилишларича,  Дилором Йўлдошева Адлия вазирлиги томонидан йўлга қўйилган “Мадад” ижтимоий-ҳуқуқий лойиҳасининг илк иштирокчисидир. Бундан ташқари, у “Матонат” фильмининг бош қаҳрамони ҳисобланади.

• Тадбиркорлик