Республика бўйлаб белгиланмаган жойларга чиқинди ташланишининг олдини олиш мақсадида 200 га яқин замонавий видеокамералар ўрнатилди. Ушбу видеокамераларнинг “Вазиятлар маркази”да доимий назорати йўлга қўйган. Бу ҳақда, АОКАда ўтказилган брифингда Экология, атроф-муҳитни муҳофаза қилиш ва иқлим ўзгариши вазирлиги ахборот хизмати раҳбари Лола Раҳмонбоева маълум қилди.

Қайд этилишича, келгусида экология соҳасида хизматларни сифатли олиб бориш мақсадида “Вазиятлар маркази” фаолияти тўлиқ йўлга қўйилади.

Шунингдек, ягона геоахбарот маълумотлар базасини юритиш, республикадаги экологик вазиятни баҳолаш ва прогноз қилиш учун ягона мониторинг тизими ишга туширилиши ҳам белгиланган.

Вазирликнинг мавжуд йўналишларини рақамлаштиришда эса жами 8 та ахборот тизими жорий этилади.

Келгусида электрон ҳукуматни ривожлантириш мақсадида Вазирлик томонидан кўрсатиладиган давлат хизматлари аҳоли учун соддалаштирилади.

Қолаверса, тизимда меҳнат қилаётган 1000 нафардан зиёд ходимнинг IТ соҳасидаги билим ва малакалари оширилади. 20 нафар ходим халқаро таълим платформалари орқали ўқитилади.

• Брифинг
• Экология