Ўзбекистондаги барча давлат идораларининг расмий сайтлари gov.uz доменига ўтказилади. Бу ҳақда “Давлат органлари ва ташкилотларининг расмий веб-сайтлари фаолиятини янада такомиллаштириш чора-тадбирлари тўғрисида”ги ҳукумат қарорида белгиланган.

Қарорга мувофиқ, 2025 йил 1 мартдан барча давлат органлари ва ташкилотлари Uzinfocom билан шартнома тузиб, расмий веб-сайтлари ва порталлари фаолиятини фақатгина ҳукумат портали – gov.uz орқали йўлга қўяди.

Шунингдек, расмий веб-сайт Ягона платформага ўтказилганидан сўнг бир ҳафта муддатда эски расмий веб-сайтлар домен манзилларини ҳамда веб-сайт ва ундаги маълумотларни сақлаб қолган ҳолда, Ягона платформадаги расмий веб-сайтлар манзилига йўналтирилади ёки уларнинг фаолияти тўхтатилади.

Таъкидланишича, “Киберхавфсизлик маркази” ДУК Рақамли технологиялар вазирлиги билан биргаликда Ягона платформани ҳар олти ойда беғараз асосда киберхавфсизлик талабларига мувофиқлиги юзасидан экспертизадан ўтказиб боради ҳамда киберхавфсизликни бўйича таъминлаш доимий мониторингни амалга оширади.

Бундан ташқари, ҳукумат доирасида амалга оширилаётган тадбирлар тўғрисидаги ахборотларни расмий веб-сайтда жойлаштирилишидан аввал бош вазир матбуот хизмати билан келишилган ҳолда амалга оширилади.

• Давлат хизмати
• Қарор