АҚШ раҳбари Доналд Трамп бутун Ғазони бузиб ташлаш ва фаластинликларни у ердан кўчириш режаси ҳақида гапирган эди. Туркия президенти Ражаб Тоййиб Эрдўған ушбу режани танқид қилди.

Истанбулдаги Отатурк аэропортида бўлиб ўтган матбуот анжуманида Эрдўған Ғазо аҳолисини ўз ватанидан чиқариб юборишга ҳеч кимнинг ҳаққи йўқлигини таъкидлаган.

“Исроил администрацияси доимий тинчликни сақлаш ўрнига янада ҳийлакор ва шафқатсизроқ режалар тузмоқда... АҚШ маъмуриятининг сионист лоббилар таъсири остида Ғазо масаласида кун тартибига қўйган таклифлари, бизнингча, эътибор ва муҳокамага лойиқ эмас. Улар мутлақо бемаъни...

Ҳеч ким Ғазо аҳолисини уларнинг минг йиллик абадий ва ўзгармас ватанидан қувиб чиқаришга қодир эмас. Ғазо, Иордания дарёсининг ғарбий қирғоғи ва Шарқий Қуддусни ўз ичига олган Фаластин фақат фаластинликларга тегишли”, – деган Туркия президенти.

Эрдўған Ғазо секторини ўз халқидан ажратишга қаратилган ҳар қандай уринишлар, қандай бўлишидан қатъи назар, муваффақиятсизликка учрашини билдирган. Эрдўған мақсад минтақада тинчлик, барқарорлик ва тараққиётга эришиш бўлса, вазиятни кескинлаштирмасдан фаластинликлар ҳуқуқини тан олиш кераклигини таъкидлаган.

• Эрдоған
• Фаластин
• Трамп