Олтиариқ туманида содир бўлган йўл-транспорт ҳодисаси оқибатида Италия фуқароси ҳалок бўлган.

2 июнь куни соат 10:10 атрофида Фарғона вилоятининг Олтиариқ туманида содир бўлган йўл-транспорт ҳодисаси оқибатида Италия фуқароси А.У. ҳалок бўлди. Бу ҳақда Ички ишлар вазирлиги матбуот хизмати хабар бермоқда.

ЙТҲ Олтиариқ тумани “Азимобод” маҳалласидан ўтувчи 4П-148А Боғдод-Олтиариқ йўлининг 2-километрида содир бўлган. Nexia-2 ҳайдовчиси – Бағдод туманида яшовчи, 2002 йилда туғилган А.А. велосипед ҳайдаб кетаётган 67 ёшли чет эллик аёлни уриб юборган.

Оқибатда у турли тан жароҳатлари билан касалхонага ётқизилган. Бироқ кўрсатилган тиббий ёрдамга қарамай, вафот этган.

Ҳолат юзасидан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда вилоят ички ишлар бошқармаси суриштирув ишларини олиб бормоқда.

• Фарғона
• ИИВ
• YTH