Болаларни назоратсиз қолдириш ёмон оқибатларга ва ҳатто кўнгилсиз ҳолатларга олиб келиши мумкин. Эндигина 2 ёшни қаршилаётган фарғоналик Самира Тоиржонавада худди шундай ҳолат кузатилган.

Маълум бўлишича, қизалоқ магнит шарчалар билан ўйнаб келган ва шу жараёнда улардан анча-мунчасини ичига ютган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган.

Ота-онаси зудлик билан Республика шошилинч тиббий ёрдам илмий маркази Фарғона вилояти филиалига мурожаат қилади. Текширувлар ўтказилганида қориннинг икки ёнида магнитлар йиғилиб қолгани аниқланган.

Шифокорлар консерватив усулда даволашга киришиб, қайд қилдириш орқали шарчалардан 14 донасини чиқариб олади, аммо аксарияти ичкарида қолган.

Беморнинг ота-онаси болани Тошкентга, Республика шошилинч тиббий ёрдам илмий марказига олиб келган. Марказда жарроҳлик амалиёти давомида қизалоқ қорнидан 135 та магнит шарча олинган.

Тўрт ярим соат давом этган ушбу мураккаб операцияни тиббиёт фанлари доктори, профессор Ҳабибулла Оқилов ҳамда марказнинг Нозим Ўрмонов, Дилмурод Сабиров каби тажрибали мутахассислари амалга оширган.

Айни пайтда беморнинг аҳволи яхши ва у доимий шифокорлар назоратида.

• Бола
• Фарғона
• Шифокор
• shifoxona