Финляндия бош вазири Петтери Орпо мамлакат яқин келажакда Россия билан чегарада назорат пунктларини очолмаслигини айтган. Бу ҳақда “Коммерсант” хабар берди.

Қайд этилишича, аввалроқ Финляндия расмийлари назорат-ўтказиш пунктлари 11 февралгача ёпилишини маълум қилган эди.

“Биз тушунганимиздек, шарқий чегара ортида Финляндияга ноқонуний равишда келишни мақсад қилган одамлар бор... Чегараларнинг ёпилишини бекор қила олмаслигимиз аниқ”, - деди Петтери Орпо “Y TV” телеканалида.

Унинг қўшимча қилишича, минглаб одамлар Россиядан Финляндияга киришни хоҳлашади. Бош вазирнинг сўзларига кўра, расмийлар чегара очилгунга қадар ноқонуний миграцияга чек қўйиш чораларини ишлаб чиқиши керак.

Финляндия ҳукумати 2023 йил ноябрь ойи ўрталарида Россия билан чегарадаги назорат-ўтказиш пунктлари фаолиятини чеклашни бошлаб, йил охиригача уларнинг барчасини ёпиб қўйган. 11 январь куни эса назорат-ўтказиш пунктининг ёпилиши 11 февралгача узайтирилган. Финляндия ҳукумати бундай чораларни Россия ҳудудидан келаётган ноқонуний муҳожирларнинг кўплиги билан изоҳлади.

• Чегара
• Finlandiya
• Россия