Тошкент вилоятида кибержиноят билан шуғулланган тўрт нафар шахс фуқароларни алдаш орқали катта миқдордаги маблағни ноқонуний равишда қўлга киритгани учун қўлга олинди. Бу ҳақда Тошкент вилояти ИИББ Киберхавфсизлик хизмати хабар берди.

Маълум қилинишича, 2005 йилда туғилган Б.Н. ва унинг уч нафар шериклари Telegram ва Instagram ижтимоий тармоқларида “Лимитлаш хизмати” номли саҳифа очиб, фуқароларга микромолия ташкилотлари томонидан берилган кредит лимитларини нақдлаштиришни ваъда қилишган.

Гумонланувчиларлар ўзлари рўйхатдан ўтказган тадбиркорлик субъекти орқали онлайн савдо платформаларида фаолият юритиб, 600 нафар фуқародан жами 1 миллиард 32 миллион сўм миқдоридаги маблағни фирибгарлик йўли билан қўлга киритган.

Ҳозирда уларга нисбатан Ўзбекистон Республикаси Жиноят кодексининг 168-моддаси 4-қисми “а” банди (фирибгарлик) бўйича жиноят иши қўзғатилган. Суд томонидан уларга нисбатан “қамоққа олиш” эҳтиёт чораси қўлланилган.

Фуқароларга етказилган моддий зарарни ундириш чоралари кўрилган ҳолда дастлабки тергов ишлари олиб борилмоқда.

• Фирибгарлик
• Ўзбекистон