Жаҳон соғлиқни сақлаш ташкилоти вабо эпидемияси бўйича янги ҳисоботини эълон қилди. Унда қайд этилишича, 2023 йили дунё бўйича бу хавфли инфекциядан ўлим кўрсаткичи 2022 йилга нисбатан 71 фоизга, касалланиш ҳолатлари эса 13 фоизга ошган.

“Ўтган йили вабодан 4000 киши вафот этди. Иқлим ўзгариши, баъзи минтақаларда ичимлик суви танқислиги, қашшоқлик, санитария шароитлари етишмаслиги, уруш ва ҳарбий тўқнашувлар хасталик кучайишига сабаб бўлди”, – дейди ЖССТ раҳбари Тедрос Гебрейесус.

Ҳисоботга кўра, жорий йилда ҳам эпидемиологик вазият мураккаб. Хусусан, 2024 йил бошидан буён 342 мингдан ортиқ беморда ушбу инфекция аниқланган, улардан 2,4 минг нафари ҳаётдан кўз юмган.

Жумладан, июль-август ойлари оралиғида Суданда қарийб 2,7 минг кишига вабо ташхиси қўйилган. Улардан 120 нафарининг ҳаётини сақлаб қолиш имкони бўлмаган.

ЖССТнинг вабо бўйича техник раҳбари Филипп Барбоза фикрича, касаллик қурбонлари сони расмий статистикадан анча юқори. Аслида уни ҳар йили тахминан 2 миллионга яқин киши юқтириб, 100 минг нафари ҳаётдан кўз юмаётган бўлиши мумкин.

• ЖССТ
• vabo