Шавкат Мирзиёевнинг 16 февраль кунги фармони билан ўзгаришлар амалга оширилди. Бу ҳақда президент матбуот хизмати хабар берди.

Маълум қилинишича, Ҳилола Ўктамовна Умарова Ўзбекистон Республикаси мактабгача ва мактаб таълими вазирининг педагогик таълимни ривожлантириш масалалари бўйича ўринбосари – Низомий номидаги Ўзбекистон миллий педагогика университети ректори лавозимига тайинланган. Шу муносабат билан у Президент администрацияси раҳбарининг таълимни ислоҳ қилиш бўйича ўринбосари лавозимидан озод этилган.

Ҳилола Умарова 1988 йил 9 август санасида Германиянинг Ваймер шаҳрида туғилган. У 2010 йил Жаҳон иқтисодиёти ва дипломатия университетининг бакалавр босқичи, 2013 йил эса ушбу университетнинг магистратура босқичини тамомлаган.

Фаолияти давомида Тошкент шаҳридаги Инҳа университетининг фаол тадбиркорлик, инновацион ғоялар ва технологияларни қўллаб-қувватлаш масалалари бўйича бош менежери лавозимида ишлаган. 2020 йил октябрда Президент, ижод ва ихтисослаштирилган мактабларни ривожлантириш агентлигига раҳбар этиб тайинланган.

У 2022 йил декабридан мактабгача ва мактаб таълими вазири сифатида ишлаган. 2025 йил июль ойида президент фармони билан   Президент администрацияси раҳбарининг таълимни ислоҳ қилиш бўйича ўринбосари лавозимига тайинланган. Умарова “Ўзбекистон белгиси” кўкрак нишони билан тақдирланган.