Қирғизистон Миллий хавфсизлик давлат қўмитасининг собиқ раҳбари футбол иттифоқи президенти лавозимини тарк этишини маълум қилди. Қарор 15 апрель куни Бишкекда бўлиб ўтган футбол иттифоқи конгрессида эълон қилинди.

Унинг айтишича, эндиликда футбол бошқаруви спортни чин дилдан севувчи мутахассислар қўлига ўтиши керак. Шунингдек, у ўз фаолияти давомида белгиланган вазифаларни бажарганини таъкидлаб, бу лавозимда икки йилдан ортиқ ишлаганини қайд этди.

Конгресс давомида футбол иттифоқи раҳбариятига янги номзодлар йўқлиги сабабли сайлов масаласи кун тартибидан чиқариб ташланган.

Аввалроқ у хавфсизлик тизимидаги юқори лавозимдан ҳам озод этилган эди. Шундан сўнг мамлакатда бир қатор кадр ўзгаришлари ва ҳибсга олиш ҳолатлари кузатилган.

Ҳозирча собиқ раҳбар сўнгги сиёсий жараёнларга изоҳ бермаган.