Сурхондарё ва Хоразм вилоятларида ўтказилган тезкор тадбирлар давомида йирик миқдордаги наркотик моддаларнинг ноқонуний айланишига чек қўйилди.

ДХХ ва ички ишлар органлари ҳамкорлигида ўтказилган операцияда икки ҳолатда жами қарийб 9 кг опий мусодара қилинди.

Биринчи ҳолатда, Қўшкўпир туманида яшовчи, илгари ҳам наркожиноят учун судланган шахс Урганч тумани ҳудудида тўхтатилиб текширилган. Натижада ундан 4 кг 407 грамм опий топилиб, ашёвий далил сифатида расмийлаштириб олинган.

Иккинчи ҳолатда эса “Беруний–Урганч” йўналишида ҳаракатланган “Lacetti” автомобили тўхтатилган. Унда кетаётган яна бир фуқаро ёнидан 4 кг 541 грамм опий аниқланиб, мусодара қилинган.

Аниқланишича, ҳар икки шахс ушбу наркотик моддаларни Афғонистондан контрабанда йўли билан олиб кириб, Хоразм вилоятида сотишни режалаштирган.

Мазкур ҳолатлар юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланган. Тергов ҳаракатлари давом этмоқда. Фуқароларни бундай жиноятларга бефарқ бўлмасликка ва шубҳали ҳолатлар ҳақида тегишли идораларга хабар беришга чақирилмоқда.