Фарғона вилоятида 800 ўринли замонавий кўп тармоқли шифохона қуриш бўйича йирик лойиҳа юзасидан муҳим келишув имзоланди.

Лойиҳага кўра, шифохона халқаро стандартлар асосида лойиҳаланади, молиялаштирилади, қурилади ва жиҳозланади. Шунингдек, объектга узоқ муддатли техник хизмат кўрсатиш ҳам йўлга қўйилади.

Уч томонлама битим Соғлиқни сақлаш вазирлиги ҳамда хорижий ва маҳаллий инвесторлар ўртасида тузилган. Лойиҳа давлат-хусусий шериклик асосида амалга оширилади ва Марказий Осиёдаги энг йирик тиббий лойиҳалардан бири бўлиши кутилмоқда.

Лойиҳанинг умумий қиймати қарийб 300 миллион АҚШ долларини ташкил этади. Қурилиш ишлари 36 ой давом этади.

Янги мажмуа ҳудуддаги бешта ихтисослашган тиббиёт муассасасини ягона комплексга бирлаштиради. Унда кардиожарроҳлик, нейрожарроҳлик, трансплантация, нефрология ва ортопедия йўналишларида юқори технологик хизматлар кўрсатилади.

Шунингдек, мажмуада 160 ўринли интенсив терапия ва шошилинч тиббий ёрдам бўлимлари ҳам ташкил этилади.