Ҳиндистоннинг Одиша штатида юз берган поезд тўқнашуви оқибатида ҳалок бўлганлар сони 288 кишига етди. Бу ҳақда Франс Пресс нашри штат ёнғин хавфсизлиги хизмати бошлиғи Судханша Сарангига таяниб, хабар бермоқда.

Қайд этилишича, поездлар Баласоре шаҳри яқинида тўқнашган. Темир йўл идораларининг янгиланган маълумотларига кўра, Калкуттадан Ченнайга кетаётган йўловчи поездининг 10-12 вагонлари юк поезди билан тўқнашувдан сўнг релсдан чиқиб кетган ва қарама-қарши йўлни тўсиб қўйган. Бироз вақт ўтгач, уларга яна бир йўловчи поезди келиб урилган, натижада ичида одамлар бўлган яна уч-тўртта вагон релсдан чиқиб кетган.

Жабрланганларга ёрдам бериш учун юзлаб хизматчилар жалб қилинган. Кўплаб йўловчилар ағдарилган вагонлар остида қолган бўлиши мумкин.

Қутқарув операцияси қизғин давом этмоқда, Баласоре ва унинг атрофидаги шифохоналар ярадорларни қабул қилишга ҳозирлик кўрмоқда.

• Ҳиндистон
• Поезд