Чигирткага қарши кураш тадбирларини зарарли чигиртка 3-4 ёшида бўлганида ўтказиш мақсадга мувофиқ. Бу зараркунанда қанот чиқаргунигача бўлган фаза. Сабаби чигиртка қанот чиқарганидан сўнг бир кунда камида 50-60 километр масофани босиб ўтиши ва йўлида учраган барча яшилликни еб битириши мумкин.

Қорақалпоғистон Республикаси ҳамда Навоий, Бухоро ва Самарқанд вилоятлари ҳудудларида тунги кимёвий ишлов бериш тадбирлари тонгга қадар олиб борилиб, бугунги кунда саксовул букур чигирткаси бартараф этилмоқда.

Муҳим эслатма: саксовул букур чигирткаси қишлоқ хўжалиги экинлари, яйловларга хавф туғдирмайди!

Бу турдаги тўда ҳосил қилувчи чигирткалар саксовул билан озиқланади. Ҳашарот саксовулзорларга зарар етказмаслигини таъминлаш мақсадида кимёвий тадбирлар мониторинг асосида олиб борилмоқда.

Алоҳида эътибор трансчегаравий ҳудудларга қаратилиб, қўшни давлатлардан зарарли ҳашарот кириб келиши ва тарқалишини олдини олиш мақсадида маълумотлар алмашинуви йўлга қўйилган.

Ўсимликлар карантини ва ҳимояси агентлигининг Чигиртка ва тут парвонасига қарши кураш хизмати ходимлари томонидан чегарадош вилоятларда тун-у кун назорат тадбирлари олиб бориляпти.

• Навоий
• O'simlik
• Қорақалпоғистон
• Самарқанд