Сўнгги ойларнинг энг муҳокамада бўлиб турган мавзу – Sea Breeze лойиҳаси юзасидан яқин орада расман ҳукумат қарори қабул қилиниши кутилмоқда. Фаоллар томонидан билдирилган эътирозлар инобатга олинди, компания олдига қатор шарт ва мажбуриятлар қўйиладиган бўлди.

Бу ҳақда Экология, атроф-муҳитни муҳофаза қилиш ва иқлим ўзгариши вазирининг маслаҳатчиси Расул Кушербаев ўзининг расмий саҳифаси орқали маълум қилди.

“Тошкент шаҳрини ичимлик суви билан таъминловчи Чорвоқ сув омборига қурилаётган лойиҳалардан сув тушиши хавотир уйғотаётган эди. Қўйилган талаблардан бири – Чорвоқ ва Чирчиқ дарёсига сув туширилмайди. Инвестор ушбу лойиҳа учун сувни қайта ишлайдиган ва яна ўзига ишлатадиган замонавий тизим яратади, бу борада харажатлар тўлиқ инвестор ҳисобидан амалга оширилади.

Ҳукумат қарорида агар қоидалар бузилса ва Чорвоққа бир томчи сув туширилса ҳам, лойиҳа қурилиши тўхтатилиши ҳамда инвестиция шартномаси бекор қилиниб, ер олиб қўйилиши қатъий белгилаб қўйилмоқда.

Бош прокуратура курорт ҳудудида барча шаҳарсозлик ва экологик меъёрларга риоя этилишини алоҳида назоратга олади. Вазирлар Маҳкамаси ва Бош прокуратура дастлабки лойиҳа ечимларидан тортиб, объектларни фойдаланишга топширишгача бўлган барча жараёнларнинг шаффофлиги ва қонунийлигини таъминлашга масъул бўлади” – деб ёзган Расул Кушербаев.

• Chorvoq
• Ҳукумат